ചായക്കട - കർഷകൻറെ കണ്ണീർ ആരു കാണും?

മറ്റെല്ലാ സംസ്ഥാനങ്ങളും കാര്‍ഷികമേഖലയുടെ വികസനത്തിന് തൊഴിലുറപ്പു പദ്ധതി ഉപയോഗിച്ചപ്പോള്‍ കേരളത്തില്‍ റോഡിന്റെ വശങ്ങളിലെ കാടു തെളിക്കാനും ചവറു നീക്കാനും മാത്രമാണ് ഈ പണം വിനിയോഗിച്ചത്. കേരളത്തില്‍ കുടുംബശ്രീ പ്രവര്‍ത്തകരാണു മുഖ്യമായും തൊഴിലുറപ്പു പദ്ധതിയിലുള്ളത്. രാഷ്ട്രീയനേട്ടത്തിനായി ഇവരെ ഉപയോഗിക്കാന്‍ തുടങ്ങിയതാണു പദ്ധതി വെറും 'പുല്ലു പറിക്കലായി' മാറാന്‍ കാരണം. ദാരിദ്ര്യരേഖയ്ക്കു താഴെയുള്ളവര്‍ക്കു വര്‍ഷം നൂറു തൊഴില്‍ദിനമെങ്കിലും ഉറപ്പുവരുത്തണമെന്നാണു പദ്ധതിവ്യവസ്ഥ. ആദ്യം തരിശായി കിടക്കുന്ന സര്‍ക്കാര്‍ഭൂമി കൃഷിയോഗ്യമാക്കാനാണു പദ്ധതി വിനിയോഗിച്ചിരുന്നത്. എന്നാല്‍ ഇപ്പോള്‍ സ്വകാര്യവ്യക്തികളുടെ പുരയിടങ്ങളിലെ പണികളും ചെയ്യാന്‍ അനുമതിയുണ്ട്. സാമ്പത്തികശേഷിയുള്ള ഭൂവുടമകള്‍ക്കു സര്‍ക്കാര്‍ ചെലവില്‍ 'സൗജന്യസേവനം' ലഭിക്കുന്നതാണു നേട്ടം. റോഡരികിലും സര്‍ക്കാ ര്‍ പുറമ്പോക്കിലും തെളിച്ച കാട് ദിവസങ്ങള്‍ക്കകം പഴയപടിയാകുകയും ചെയ്യും.