A tarde 12-09-2025

Falamos das disputas familiares para escoller o nome dos meniños. O párroco de Xestoso, Luis Ángel Rodríguez, desvélanos cales son os nomes máis raros cos que baptizou aos fregueses. Msarcus Fernández explícanos as novidades do Iphone 17. Entramos na polémica que xerou na Coruña a creación de praias para cans. O xerente dos armadores de Burela, Miguel Leira, cóntanos como vai a costeira do bonito e o presidente do Consello Regulador da Faba de Lourenzá, José Cuadrado, fachendea das cualidades deste producto. Desprazámonos á Veiga para atopar un cordobés que se dedica a producir queixo na montaña ourensá. Imos a un mercado efémero de moda vintage en Vigo. Hugo Torres fálanos do seu espectáculo de música con plantas. Escoitamos os consellos do farmacéutico e divulgador Iago Regueira e falamos da posible existencia de vida en Marte no pasado co astrónomo Borja Tosar.